ចិន៖ គណៈកម្មការសុខភាពជាតិរបស់ចិន ឬ National Health Commission (NHC) បានឱ្យដឹងនៅថ្ងៃអង្គារនេះថា មានការរកឃើញករណីឆ្លងជំងឺផ្តាសាយបក្សី ទៅកាន់មនុស្សជាលើកដំបូងបង្អស់លើបុរសវ័យ ៤១ឆ្នាំម្នាក់ ដែលរស់នៅខេត្ត ជាំងស៊ូ (Jiangsu) ភាគខាងកើតប្រទេសចិន។ NHC ក៏បានបញ្ជាក់ថា បុរសវ័យ ៤១ឆ្នាំខាងលើ ត្រូវបានគេបញ្ជូនទៅកាន់មន្ទីរពេទ្យក្នុងក្រុង Zhenjiang បន្ទាប់ពីមានអាការៈក្តៅខ្លួន និងបានបញ្ចេញរោគសញ្ញាគួរឱ្យសង្ស័យមួយចំនួន។ ក្រោយមក នៅថ្ងៃទី ២៨ ខែឧសភា បុរសរូបនោះត្រូវបានគេរាយការណ៍ថា គាត់បានឆ្លងជំងឺផ្តាសាយបក្សីប្រភេទ H10N3 ប៉ុន្តែមិនមានសេចក្តីរាយការណ៍លម្អិតណាមួយថាតើគាត់បានឆ្លងវីរុសនេះដោយរបៀបណាឡើយ។

យ៉ាងណាក៏ដោយ បើតាមអាជ្ញាធរសុខាភិបាលរបស់ចិនបានបន្ថែមថា ករណីនេះគឺជាការចម្លងវីរុសពីបសុបក្សីទៅកាន់មនុស្សដោយផ្ទាល់ ប៉ុន្តែបែបណាក៏ដោយ ហានិភ័យនៃការរាតត្បាតដែលកើតចេញពីវីរុសនេះគឺមានកម្រិតទាបខ្លាំងបំផុត។ មកដល់ពេលនេះ បុរសខាងលើមានស្ថានភាពធូរស្រាលទៅហើយ ហើយក៏ត្រៀមចាកចេញពីមន្ទីរពេទ្យផងដែរ ស្របពេលការតាមដានទៅលើអ្នកពាក់ព័ន្ធផ្សេងក៏រកមិនឃើញករណីឆ្លងបន្តដែរ។

កន្លងមក ករណីផ្តាសាយបក្សីត្រូវបានរកឃើញជាបន្តបន្ទាប់នៅទឹកដីចិន ប៉ុន្តែមិនមានការរាតត្បាតណាមួយធ្ងន់ធ្ងរគួរឱ្យចាប់អារម្មណ៍ឡើយ ក្រៅពីករណីវីរុសផ្តាសាយបក្សីប្រភេទ H7N9 ដែលបានសម្លាប់មនុស្សប្រមាណ ៣០០នាក់កាលពីឆ្នាំ ២០១៦-២០១៧ កន្លងទៅ។ ដោយឡែកសម្រាប់ករណី H10N3 វិញ នេះគឺជាករណីឆ្លងទៅកាន់មនុស្សដំបូងបំផុតដែលគេបានរកឃើញ៕